Budaya betawi dalam menyambut bulan puase

Dulu orang kampung kite kalo mo ngadepin bulan Ramadhan alias bulan puase, sebulannye udeh mulai sibuk; ade nyang pade jiareh sambil ngored kuburan, rowahan, penutupan pengajian, sholat nisfu wah pokoknye pade giat dan penuh semangat.

Apalagi dah menjelang nyang namanye munggahan ntuh orang pade bererod digalengan pada mo ke pasar, yang namanye saur pertame bocah di rumah kudu pade makan enak, biasanye searinye makan lauknya tembang garang kalo pas saur ari pertame minimal sayur bandeng mah kudu ade.

Siangnye mo malem Ramadhan ntuh nyang namanye selebar gang dipasangin colen dan pelita biar kage gelap, apalagi sumur senggot yang dulu mah letaknye jauh di belakang rumah kudu dikasih pelita, biar kage jumbleng pan buat ajag-ijig dimalem ari, ambil wudhu, nyuci beras, ambil aer dan keperluan laennye, biar keliatan dan kage pade nyemplung ke sumur.

Aroma bakaran merang begitu berasa diidung, ntuh merang dibakar biar item dan abunye dimasukin ketengkat atawa bokor kecil atasnye ditutupin kaen tipis buat nyaring abu merang, tengkat dikasih aer ntuh abu merang nyang berwarna item siap buat dikeramasin di kepala.

Orang dulu kalo mo puase kudu keramas biar bersih, badan nyang bedaki dibersi’in pake bite atawa batu, kuku kaki ame tangan dikerik pake beling semprong biar putih dan gigi digosokin pake bite atawa bata merah biar kinclong dan kalo nyang pengen wangi itu awak mandinye pake kembang yang boleh metik di kebon, dulu mah kembang pan masing pade belatak, kembang ape aja ade.

Begitu dah kegembiraan orang dulu nyambut bulan puase, bener-bener bersih luar dan dalem, suasane kampung begitu berasa hawa surganye, ntuh suara bedug seabis maghrib kage ade berentinye bocah pada cetom berebut nakol bedug, suara ntuh bedug bikin kite semangat buat buru-buru ngelepit sajadeh, sarungan dan bergegas segera ke langgar, ntuh Isya masing jauh ntuh orang udeh penuh di langgar.

Pokoknye aroma Ramadhan di jaman dulu begitu berase kaga kaya sekarang orang kaya ogah-ogahan alias koh-kohan, puasa tinggal bulanye doang...

😂😂 😂😂 😂😂😂 😂